► ♪ ♫

Archive for the ‘►’ Category

කැමති නම් ඇවිලෙන්න …

In , quote from a News Paper, quoted Text on August 21, 2010 at 2:15 pm

“බොහෝ දේ උගැන්වීම මඟින් ඔබේ අහංකාරකම තෘප්තිමත් කරගැනීමට උත්සහ නොකරන්න. ජනයාගේ කුතුහලය පුබුදුවාලන්න. මනස් විවර කිරීමම ප්‍රමාණවත්ය. ඒවාට ඕනෑවට වඩා බර නොපටවන්න. ගිනි පුපුරක් පමණක් එහි දමන්න. හොඳ ගිනිගන්නා සුලු කිසියම් දෙයක් වේ නම් එය ගිනිගනු ඇත.”  — ඇනටෝල් ෆ්‍රාන්ස්

අපි ගිනි පුපුරු අවුළුවමු. අපගේ ශ්වසනය ද නොතකා අළු පිඹ අළු කාගෙන අලුයම ගිනි පුපුරු අවුලුවමු. ඒ විවෘත මනසැති ඔබ වෙනුවෙනි. අප පුරාවෘත්තවල සඳහන් ගිනි දෙවියාගෙන් ගින්දර ගෙන ආ  වීරයන් නොවන්නට පුලුවන. අප ගල් යුගයේ ගලට ගල ගසා ගිනි ඉපැද්දූ හොමෝ ඉරෙක්ටස්ලා වන්නට පුලුවන. ඒත් මේ වෑයම අඳුර ඉරා මාවත පහන් කරන පහන් වැටක් වන්නට ඔබට පසුබිම සැකසීමය.

“එන්න, කැමති නම් ඇවිළෙන්න.”

(ඇනටොල් ෆ්‍රාන්ස්ගේ ප්‍රකාශය ටී. අන්ද්‍රදි ගේ ‘විශ්ව ග්‍රන්ථාවලියේ ජේද කෝෂයක්’ ග්‍රන්ථයෙනි.)

– දිශාන් අනුරාධ | 18 පිටුව : (‘රාවය’ – 2010 මැයි 09)

Bhagath Singh – On the path of liberation | ‘නිදහස් අරගලයේ ආදර්ශය, භගත් සිං’ කෘතියෙනි.

In , quote from a Book, quoted Text on July 5, 2010 at 12:19 pm

“…. සැමකෙක්ම පවසනුයේ සත්‍ය ආගම තමන්ගේ විශ්වාසය පමණක් බවය. දුෂ්ඨත්වයේ මුල මෙයයි. අනාගත අරගල‍ය සඳහා මතවාදී ආයුධ අපට සපයන පුරාතන චින්තනයන්ගේ අදහස් සහ අත්හදා බැලීම් සංවර්ධනය කරනු වෙනුවට අපි ගතානුගතික ආගමක සිරවෙමු. මෙලෙස මිනිසාගේ පිබිදීම නිශ්චල ජලාශයක ගිල්වා දමයි.”

“ප්‍රගතිශීලීත්වය වෙනුවෙන් පෙනී සිටින සෑම පුද්ගලයෙකුම පැරණි විශ්වාසයන්ගේ සියලු ඇදහිලි විවේචනය කිරීම අත්‍යවශ්‍යය. කරුණෙන් කරුණ පැරණි විශ්වාසයන්ගේ ගුණය අභියෝගයට ලක් කල යුතුය. සියලු විස්තර විශ්ලේෂණය කර වටහා ගත යුතුය. දැඩි තර්කනයකින් පසුව පවා ඕනෑම දර්ශනයක න්‍යායක් විශ්වාස කිරීමට යොමු වෙයි නම් ඔහුගේ විශ්වාසය පිළිගැනීමට ලක් වේ. ඔහුගේ තර්ක ක්‍රමයේ අඩුපාඩු පැවතිය හැකිය. නැතහොත් සාවද්‍ය විය හැකිය. ඔහුගේ ජීවිතයට මඟ පෙන්වන මූලධර්මය තර්කය බැවින් නිවැරදි වීමට ඔහුට අවස්ථාවක් තිබේ. එහෙත් අන්ධ විශ්වාසය විනාශකාරීය. එය මිනිසා සිය අවබෝධයේ ශක්තියෙන් ගලවා ප්‍රතිගාමියෙකු බවට පත් කරයි.”

“තමා යථාර්ථවාදියෙකු යයි හඳුන්වා ගන්නා ඕනෑම පුද්ගලයෙකු පැරණි විශ්වාසයන්හී සත්‍යයට අභියෝග කළ යුතුය. විශ්වාසයට තර්කයේ නිර්දය ප්‍රහාරයට ඔරොත්තු දිය නොහැකි නම් එය බිඳ වැටේ. ඉන් පසු ඔහු‍ගේ කාර්්‍යය විය යුත්තේ නව දර්ශනයක් සඳහා මූලික කටයුතු වල නියැලීමය. නිශේධනාත්මක පක්ෂය මෙයයි. ධනාත්මක කටයුතුවලට එළැඹෙනුයේ ඉන් අනතුරුවය. එහිදි පැරණි කාලයේ ඇතැම් ද්‍රවශ නව දර්ශනයේ කුළුණු ඉදිකිරීමට භාවිතා කළ හැකිය. මෙම කේෂ්ත්‍රයේ ප්‍රමාණවත් අධ්‍යයන සිදුකර නොමැති බව මම පිළිගනිමි. පෙරදිග දර්ශනය හැදෑරීමේ දැඩි අභිලාෂයක් මා තුළ තිබුණ ද මට ඒ සඳහා තිබුණේ සීමිත අවස්ථාවක් සහ කාලයකි.එහෙත් මා ඉපැරීණ ිවිශ්වාස ප්‍රතික්ශේප කල පමණින් එය විශ්වාසයක් තවත් විශ්වාසයයකට එරෙහිව යෙදවීමක් නොවේ. ඊට වඩා ඉපැරණි විශ්වාසවල ගුණයට ප්‍රබල තර්ක මඟින් අභියෝග කිරීමට මට පුලුවන. මානව ප්‍රගමනය රඳා පවතින්නේ සොබා දහම පාලනය කිරීමට මිනිසා දක්වන සමත්කම මත බව අපි විශ්වාස කරමු. එය පසුපස සවිඥානික බලවේගයක් නොමැත. අපගේ දර්ශනය එයයි.”

‘නිදහස් අරගලයේ ආදර්ශය, භගත් සිං’ කෘතියෙනි.

Bhagath Singh – On the path of liberation
By Shiv Verma
පරිවර්තනය: උදිත අලහකෝන් (සමාජවාදී තරුණ සංගමයේ ප්‍රකාශනයක්)

2010

In , quote from Web, quoted poem on January 6, 2010 at 10:41 am


“2010”

අතීතය කරින් ගත්
මිනිසෙක්ය මංසලක

ඔව්..ඔහුට
මල් වෙඩිල්ලක් නොවෙයි
ජීවිතය..

සුළං තටු පහර වැද
දාස්පෙතියා මලක්
දැදිරි වී බිම වැටෙත
ඔහු දෙපා අද්දරම
‘ආචාර වෙඩිමුරයකැයි’
කෙලෙස කියන්නද..?

අමාවක මැදියමක
ඔහු කොපුල මත වැටෙන
වැහි බිංදු
සෙමෙර නොව
හී තුඩුය..

සිහිනයක් දුහුවිලිව
ගිය කලට
තණපතත්
ඔහුට
මතු මහලකිය

ඒ නිසා දැන් ඔහුට
තණසුළක් යට වුවත්
සැතපෙන්න ඉඩ ඇතිය

අතීතය කරින් ගත්
මිනිසෙක්ය මංසලක
සිනහවක් සිතක නැති
කඳුලකුත් නෙතක නැති..

-රසික ජයකොඩි-
2009-12

[බූන්දි|BOONDI]

නිහඬ ගීතය

In , quote from a Book, quote from Web, quoted poem on November 5, 2009 at 3:05 pm

ගීතය නිහඬය
නොගැයිනි තවම

දිනෙන් දින
දිනෙන් දින ගෙවුනත්
සලමින් පිරික්සමින්
සකසමින් වීණාවේ සර

එළඹ නැත
නිසි මොහොත
නැත වදන් ගැලපී
පෙල ගැසී
හද රිදුම් දුන්නත්
පිරී කැලතෙන ප්‍රාර්ථනාවන්

පියුම නැත පිබිදී
හමා යන මුත් නල
ගෙන යන්න
එහි සුවඳ

නෙත ගැසී නැත වත
සවන නොරැඳිනිය හඬ
පා ගැටෙන සර පමණි
සරණ විට ඔහු මාවතේ

දිග හැරෙයි ජීවිතය
දිග ඇදෙයි සෙවනැලිත්..
එහෙත් තවමත්
පහන දැල්වී නොමැත
හැර පියන්නට
දොර පියන්
වඩින්නට මා කුටියට…

හමුවීම…
ජීවිතයේ…
ප්‍රාර්ථනාවක්ම
පමණකි
තවම
නොපිපුණු.

► ‘ගීතාංජලී’ – රබින්ද්‍රනාත් තාගෝර්
From Boondi Live Mail

අසම්මතවාදියා on The Outsider

In , quote from a News Paper, quoted Text on August 27, 2009 at 7:01 am

සාම්ප්‍රදායික මාතෘ ප්‍රේමය, ගැහැනියකට කරන ආලය ඔහුට නො‍තේරෙන බසකි. වංචාවෙන් පිරී තිබූ ඒ බස භාවිත කිරීමට ඔහු උත්සහ කළේ නැත. මර්සෝ, සුචරිතයෙකු හෝ දුෂ්චරිතයකු නොවේ. ඔහු කිසිසේත් කිසියම් කොට්ඨාසයකට ඇතුළත් කළ නොහැකිය. එහෙත් ඔහු අසම්මත චරිතයකි. අසම්මත යන්නෙන් අන්තගාමී ගුඪත්වයක් ප්‍රකට නොකරේ. මිනිසාට ‍හෝ ලෝකයට ආගන්තුක අසම්මතයක් මෙහි නැත. මෙම චරිතය වනාහී මිනිසකු වශයෙන් මිනිස් ලෝකයේ ජීවත්වීම සඳහා අවශ්‍ය වූ අසම්මත තත්ත්වයකි. මෙම චරිතය මිනිසත්බව වසා සිටින අන්ධකාරයට සියුම් ආලෝකයකි. තර්කයෙන් පැහැදිලි කළ හැකි ලෝකය අපට හුරුපුරුදුය. එහෙත්, සැණෙකින් කල්පිතයන් සහ ආලෝකය අතුරුදෙහන් වූ ලෝකයක මිනිසාට තමා අමුත්තෙකි. නොකඩවා පවතින ඒකාකාරී ජීවිත රිද්මය – බලාපොරොත්තු කඩවීම – ආගම විසින් මිනිසා රවටනු ලැබීම – යන සියලු දෙයින්ම මිනිසා අපරිමිත අසහනයකට පත්කරනු ලබයි. කායික ජීවිතයේ උද්වේගකර බවත්, මරණයෙහි නියත බවත් අතර ගැටුම මිනිසා අසරණ බවට පත්කරයි. මර්සෝගේ චරිතය එම අසරණ කිරීමට එරෙහි භවසත්තාවාදී දාර්ශනික සාක්ෂියකි.

හෙටයැ’යි දිනයක් නැත. අප හැම දිනම මිය යන බැවිනි. කිසියම් ලොවක කිසියම් මොහොතක මිනිසා එම ලොවට පිටස්තරයකු සේ හැඟේ. එම කූඩුවෙන් පලායෑමට දොරටුවක්නැත. බලාපොරොත්තු කඩවීම හා මමත්වය ඔහුට අවාසනාත ළඟාකරයි. ඔහු ජීවත් වන්නේ ලෝකය ඉදිරියේ හෝ පසුපසයි. ඔහු තමා විසින්ම දිවි තොර කරගන්නෙකි.

අසම්මතවාදියා ඔහු විසින්ද දිවි තොර කර නොගනී. ඔහුට ජීවත්වීමට අවශ්‍යය. සම්මතයන් ඔහුට අවශ්‍ය නොවේ. සම්මත කිසිවක් ඔහුට නැත. බලාපොරොත්තුව මායාවකි. හෙට ගැන සිතීම නිෂ්ඵලය. වගකීමෙන් තොර ඝාතනයට ඔහු එරෙහි වේ. මිනිසුන් අතර මිනිසෙකු සේ ජීවත්වීමට පෙ‍ළඹේ. මර්සෝ (Indifference) උපේක්ෂාශීලියෙකි.

අසම්මතවාදියා වර්තමානයේ මිනිසෙකු වශයෙන් ජීවත්වීමට උත්සහ දරයි. ඒ සඳහා අහිංසක අරගලයක යෙදෙන මර්සෝ අහිංසකයකු මිස වීරයෙක් නොවේ. ඔහු මිනීමරුවකු වන්නේ ඔහු නොඉවසන සමාජ ක්‍රීඩාවේ නීතිරීති නොසැලකීමෙනි. ඔහු ජීවත්වන්නේද ආගන්තුකයන් අතර ආගන්තුකයකු ලෙසිනි. ඔහුටද ඔහු ආගන්තුකයෙකි. මරී, ‘අනියම් බිරිඳ’ ඔහුට කැමති වන්නේද ඔහුගේ අසම්මත ස්වභාවය නිසාය. සියලු දෙනාම ඔහු පිළිකෙව් කරන විට, ඔහුට අවමන් කරන විට ඇය ඔහුට ආදරය කරයි.

එහෙත් අවසානයේ අපි එම ආගන්තුකයා සමඟ බැඳෙමු. බැඳී සම්මත ලෝකයට ආගන්තුක වෙමු.

ෂන් පොල් සාත්‍ර
(ඇල්බෙයා කැමූගේ The Outsider පිටස්තරයා හි එන මර්සෝ ගැන)

► ‘රාවය’ 16 August 2009 on ‘අවකාශය’ අතිරේකය

The Stranger/The Outsider
By Albert Camus at 1943
සිංහල පරිවර්ථනය:
‘පිටස්තරයා’ – සොමරත්න බාලසූරිය

කඳුළු

In , quoted Text, Uncategorized on August 17, 2009 at 9:38 am

“දෑසින් වැගිරෙන කඳුලක් පිටුපස දිග කතාන්දර වෙයි. දුක, කළකිරීම, පසුතැවීම, නිදහස, ආත්මානුකම්පාව, සැනසීම, විඳවීම, කේන්තිය, වෛරය, අසරණකම වැනි දහසකුත් එකක් හැඟීම් ඒ කුඳුළු වල මිශ්‍ර වී ඇත. කඳුලු දෙස බලන්නට කෙනෙකු නැතිඳු ගලන කඳුළු ජීවිතයේ නපුරුම, අවාසනාවන්තම, කාළකණ්නිම කඳුළු යැයි මට සිතේ”

වස්සානය

In , quoted poem on August 14, 2009 at 6:27 am

ඔය දෑල දොඩමළුය සුවඳ බැරුවා ඉන්ට
නිල් වතුර තුරුළු කර කෙසේ අතහැර යම්ද
කෙකටියා පඳුර සුදු මල් පොකුර වඩාගෙන
සොඳුර නුඹ වගේම හිනැහේය මා එක්ක

කුඹුක් අතු වතුර අත ගගා නැමිලා දියට
දිය කෙළින හැටි පුංචි මාළුවන් දුටුවාද
පුරපසේ සඳ එක්ක තරඟයට මෝරන්ට
හුළන් දා ඔය කිම්ද මල් වරව ඉල් මහට?

සෙනේහය පිරී ගිය ඔබෙ නයන නිල් පොකුණු
දිය නිලන වැසි සමේ රැළි නගා උතුරාය
තඹර පෙති අතර හෙල් මැළි රේනූ වැසි වසින
ඔබෙ සිනාවෙන් නිවෙයි හුණුව ගිය ලේ ගිය නහර

දෙවැට දිග කරඳ වැල් ආරුක්කු යට සැඟව
නිල් කුරුලු බිළිඳු නිදි ඇහැරවන්නේ කුමට
රැගෙන දෝතට පෙරා අණුහුමට හිරු එළිය
මිහිරි වම් කිරි වගේ පොවන්නෙමි නුඹලාට

රමණීය වන ගැබෙහි මොනරුනට පිලි වියන
සන්නාලියන් කොහොම ඇන්දාද දේදුන්න
වැසි වතුර ඉහිනවා නම් ඔවුන් විහිළ්වට
කුරුල්ලෝ ඉගිල්ලි වරෙන් නුඹ මා ළඟට

වැහි වළාකුළු රංචු කඳු මුදුන් වල ලඟින
දැන් ඒවි තැනි බිමට සීතලයි මගෙ සිතට
වැසි සමේ රෑ ඇ‍ඳේ සිහිනයක් වී ඉන්න
ඔබ එන්න ඉතිං මගෙ හෙට දවස මට දෙන්න

‘ගිම්හානයේ ගිලන් වී කෘශව සියුමැලිව
ඇදී ඇදී ඉකි ගැසූ ගඟ නැවත පිරිපුන්ය
දුෂ්කරයි කියා හැර යා යුතුද ජීවිතය
කටු පොකුර සිප ගනිමි හෙට මලක් වනු පිණිස’

► රත්න ශ්‍රී විජේසිංහ
‘වස්සානය’ කාව්‍ය සංග්‍රහය.

තිබුණාවෙ, ඒ මල් පොකුර

In , සිතුවිලි, quoted poem on August 11, 2009 at 11:28 am

‘අද උදෙත් ඇය දොරටුව පාවුලේ
සිනහ මල් පොකුරක් තබා ගියාය’

කොල් බඩ මිතුරු සුළඟට
පිටුපා
ගං දියේ කසු කුසුව
දෙසවනින් පලවා
බොල් පිළිම වෙස් බැන්ද
තවත් එක දවසක
ඉන්ද්‍රජාලික
දියසරැල්ලක් වගේ
මතුවුනා නුඹ පුංචි කිඳුරිය

හඹා යන ජීවිතය
කරදරකාරී හිරුට එරෙහිව
වියදම් කරන
සිනහ මල් කිනිත්තයි නුඹ
අලුත් දවසක පෙරමගට
පිරිත් පැන් ඉහින

වෙන වෙන අරුත් දෙන
එකම ගමනක ඇදෙන
මා ඔයට බඳු
නියත දහමක්
අපට නැති හැටි සොඳුර

මංසලක් වේ
අප අපවම සොයා
තනි තනිව යා යුතු ….

කවි නිමිත්තක පැටලුනත්
නුඹ අද
යාන්ත්‍රික කය රැගෙන
යාත්‍රා කළ යුතුය
තවත් තැනකට හෙට මම
රැහැන් පැටලුම් හැර
තිබුණාවෙ
එතන එහෙමම
‘අර මල් පොකුර’
සුසුම් පදයක රුඳුන
තෙපුල් දෙන
සැමරුමක් විලසින

► ඩි.එම්. ටිම්රාන් කීර්ති
‘විල්තෙර-ලංකා’ (2009 අගොස්තු 09 ඉරිදා) | tracked at 11:08:2009

ඇයට

In , සිතුවිලි, quote from Web, quoted poem on June 23, 2009 at 5:01 am

ගලා යන්න දිය දහරක් විලස
ජීවිතය පුරා …
වනු මැනව සිසිලසක්
ගිම්හාන සමයේදී …
සොයුරියක සේ වන්න නිබඳ
මා ලග සිටින
මවක සේ සෙනෙහසින්
හොඳ නරක කියා දෙන

ලද බොලඳ පෙම්වතිය
නොම වන්න ලගින් හිඳ
චාටු බස් නොදොඩන්න
සත්‍යබව බිඳ දමන
ජීවිතේ කටුක බව
ජීවිතෙන් දැනෙන කළ
සෙවනැල්ල වන්න ඔබ
ආත්මය ළග හිඳින …

► බන්දුල සේනාරත්න
Posted: 20 Jun 2009 08:48 PM PDT
බූන්දි – අකුරු අනුරාගිකයි – විඳීම් ඉන්ද්‍රජාලිකයි

නොලියූ කවිය

In , සිතුවිලි, quote from a News Paper, quoted poem on May 27, 2009 at 4:35 am

ගැඹුරු වුව, සාගරයට
නිල් දිය බරක් නොවෙයි
අපමණ වුව, තරු රැස
රෑ අහසට වැඩි නොවෙයි

එහෙත් ..
මා සුහඳිනිය,
ඔබ සමීපයෙහි
මට මගේ හදවත
මහා බරකි

ලියූ කවියකට වඩා
නොලියූ කවියක වේදනාව
ඔබ දන්නෙහිය …

ජීවිතය පුරා
ලියන්නට මැවූ,
එහෙත්..
කිසිදිනෙක ලියන්නට නොලැබුනු–
කවියක
සදාකාලික වේදනාව
ඔබ අභියස
නිහඬ කවියකි ..

► ලලිත් කීර්තිරත්න
‘මව්බිම’-කවිකාර මඩුව (2006 දෙසැම්බර් 17) | tracked at xx:05:2009